2013/12/27

O heroe do Orzán

Emotivo vídeo de Javier González no que Xosé Seoane nos conta a historia do neno Juan Darriba.


 


Publicado en YouTube o 25 dec, 2013
1º video creado como práctica por alumnos da " Escola de Imaxe e Son " de Coruña no curso 2012 - 2013.

Realización: Javier González, Jose Manuel Sieira.
Producción: Raquel Martínez, Borja Villaronga.
Imagen: Marcos García, Jacqueline García.
Sonido: Alejandro Mella, Eloy Vidal.
Voz en Off: Elena Rodríguez.
Agradecementos: Xosé Seoane.

2013/12/26

Patrimonio perdido na Virxe da Barca

Muxía Santuario da Virxe da Barca 06 lámpada



 
Na madrugada do 25 decembro de 2014, no amencer do día de Nadal, un incendio provocado por un de tantos lóstregos do temporal arrasou o santuario da Virxe da Barca de Muxía. Velaquí algunhas fotos do interior tomadas no ano 2008.

Muxía 25 de decembro de 2013

Muxía Santuario da Virxe da Barca 01 barco colgadoMuxía Santuario da Virxe da Barca 02 barco colgadoMuxía Santuario da Virxe da Barca 03 barco colgadoMuxía Santuario da Virxe da Barca 04 Santo Domingo no primeiro corpo do retablo maiorMuxía Santuario da Virxe da Barca 05 Detalle das mans da Virxe das DoloresMuxía Santuario da Virxe da Barca 06 lámpada
Muxía Santuario da Virxe da Barca 07 Figura da Virxe das DoloresMuxía Santuario da Virxe da Barca 08 Detalle do mantón da Virxe das DoloresMuxía Santuario da Virxe da Barca 09 Face da Virxe das Dolores

Muxía 25 de decembro de 2013, un álbum en Flickr.

A noite do 24 de decembro de 2013 o santuario da Virxe da Barca en Muxía ardeu por mor dun raio durante o temporal. Velaquí algunhas fotografías tomadas no interior no inverno de 2008.

2013/12/11

Informe Pisa e o ensino en Galicia

[ESTA ENTRADA ESTÁ COPIADA DO BLOG BIBLIOTECA.MILLADOIRO.MALPICA ONDE FOI PUBLICADA O 11 DE DECEMBRO DE 2013]

 

Estes días foi noticia a publicación dos resultados do Informe Pisa.
Se todos sabemos que as competencias en educación están transferidas á meirande parte das CCAA, e polo tanto cada unha delas é responsable dos seus propios resultados, non se entende esa insistencia en falar dos resultados PISA para España. Porque non en todas as CCAA hai os mesmos temarios, nin plans, nin inversións... polo tanto: cada un a analizar o seu.
E no que a Galicia respecta sabemos que no conxunto das tres competencias analizadas temos unha puntuación de 512 puntos o que nos sitúa por encima da media da OCDE (501) e da UE (497)
Na competencia linguística temos 499 puntos, de novo por encima das dúas medias citadas (496 e 489, respectivamente).
Na C. Matemática temos 489 puntos, os mesmos que a UE e 10 menos que a OCDE.
E, por último, en Ciencias temos 512 puntos fronte a 501 e 497 da OCDE e a UE, respectivamente.
Así que, señores, nós seguiremos millorando (se nos deixan) e... cada pau que aguante da súa vela.
Tódolos datos, téndelos AQUÍ
.
Preparamos esa gráfica que recolle os resultados do informe co fin de facilitar a súa lectura. E, se queredes ampliar a reflexión sobre este informe, deixamos este artigo do profesor Felipe Zayas.

2013/12/10

Número de Nadal da revista EROSKI CONSUMER

Xa se pode consultar o numero de decembro da revista en galego Eroski Consumer, nel poderás atopar dende apps para o Nadal, un ABC sobre o magnesio, a diferenza entre paté e foie, menús especiais para estas datas, ideas para un Nadal sustentable e opcións para un Nadal solidario.
A publicación Eroski Consumer é unha iniciativa da Fundación Eroski que mes a mes normaliza o galego tanto no seu formato web coma no dixital



O galego no 1º terzo do século XX


2013/12/03

O Valego



Estes días mentres nós estamos a falar nas aulas do territorio lingüístico da nosa lingua, Henrique Costas presenta polas librerías galegas o seu libro O valego. As falas de orixe galega do Val do Ellas (Cáceres-Estremadura) publicado por Xerais.




Como vedes pode ser ben interesante coñecer como o galego se desenvolve alén das nosas fronteiras administrativas actuais.
E xa que falamos de galego no exterior, aproveitaremos para ver o vídeo de Alba e Henar, dúas rapazas do Bierzo.

2013/12/02

O descubrimento do día 01: Receitas para todos os días


Receitas para todos os días

Decidinme por fin a comezar unha nova sección na Profa á que xa lle tiña ganas dende hai tempo. Chamarase O descubrimento do día e nela irei recompilando aquelas páxinas, blogs, portais... que por algún motivo especial considere que deben ser visitados e/ou seguidos.
Pois ben, hoxe descubrín Receitas para todos os días, un blog de Raquel Vergara, onde recolle "receitas realistas" sen glute que calquera de nós cun chisco de aplicación podería realizar na súa casa e con "ingredientes doados de atopar".

E ademais, a guinda do pastel, TODAS AS RECEITAS EN GALEGO!

2013/11/23

Fina Casalderrey, a irmá máis pobre

A fotografía da autora é de Editorial Galaxia.

O 22 de novembro de 2013 Fina Casalderrey lía en Pontevedra o seu discurso de ingreso na Real Academia Galega. Chegaba unha muller máis á institución e canda ela toda a nosa literatura infantil e xuvenil.

A creación infantil e xuvenil galega é a máis vizosa das nosas literaturas, pero segue a ser a irmá máis pobre de todas elas; abonde con mirar as referencias nos medios de comunicación ao acto de onte. Tanto ten os premios que se leven, os recoñecementos todos, calquera betseller miserento é merecedor de máis páxinas e atencións.
Se quixésemos calcular todas as conversas que Fina Casalderrey ou Xabier Docampo ou Agustín Fernández Paz tiveron con escolares en Galicia, perderiamos a conta, e dubido moito que entre os tres deixen algún centro educativo da nosa terra sen escoitar a voz do autor porque percorreron a xeografía toda. Décadas de literatura repartida de balde, aula a aula, biblioteca a biblioteca. Algún día este pobo hase decatar da importancia social das súas autoras e autores, e quererá erguer con solemnidade unha estatua, mais xa será tarde para facer xustiza literaria.

Vaian os meus parabéns para Fina Casalderrey e para todas as escritoras e escritores que nos ilusionaron no pasado e que día a día seguen a alimentar os lectores do futuro.

Discurso de entrada de Fina Casalderrey na RAG en PDF.

2013/11/21

Protocolo de entrega de traballos (identificación de documentos)


Sinálanse aquí as normas para a correcta identificación de documentos:
Identificación persoal
Estrutura: cursoegrupo_apelido_apelido_nome
*Nos traballos en grupo a identificación será a da persoa que se elixa como voceira ou persoa de contacto do grupo
Ex.:
4A_ponte_patiño_pilar

Arquivo
Estrutura: identificación_nomedoarquivo_nº
*O número indicarase só no caso de arquivos que formen parte de listaxes, p.ex. nos podcast. A numeración realizarase sempre con dous díxitos para o seu correcto arquivado.
Exs.:
4A_ponte_patiño_pilar_olecernamocidade
4A_ponte_patiño_pilar_aprofa_01

Correo electrónico
Estrutura: identificación asunto
Exs.:
4A_ponte_patiño_pilar O lecer na mocidade
4A_ponte_patiño_pilar Dúbida para o exame
4A_ponte_patiño_pilar Podcast Aprofa 01

2013/11/14

Podcast A Tabarra - Surfeando as ondas 01


Nesta cuarta entrega de Podcast A Tabarra traemos un programa de tertulia sobre as formas de lecer na mocidade por Santiago Devesa Lojo, Serxio Picos Souto, Carmen Ríos García e Yaiza Romero Rodríguez de 4A.
Parabéns!


2013/11/12

Podcast A Tabarra - Animalia 01


Nesta terceira entrega de Podcast A Tabarra traemos un programa sobre fauna por Laura Miguéns Santiago e César Piñeiro Olveira de 4C.
Parabéns para os dous!


Podcast A Tabarra - Carrusel deportivo 01


Nesta segunda entrega de Podcast A Tabarra traemos un programa deportivo por Brais Betanzos Senise-Rosales, Samuel Domínguez Vázquez e Darío Fernández Sánchez de 4B.
Parabéns para os tres!


Podcast A Tabarra - GTA V 01


Nesta nova etapa, Podcast A Tabarra inaugúrase coa primeira entrega do programa GTA V sobre videoxogos realizado por Pablo Moure Rañó, Diego Pereira Davila e Alejandro Teira Chouza de 4C. Sabemos que aínda nos queda moito que perfeccionar en canto á técnica, sede comprensivos neste primeira entrega e sorprenderanvos nas seguintes. 
Parabéns para os tres!


2013/10/31

A guerra dos mundos (75 aniversario)

Hoxe fanse 75 anos da célebre emisión radiofónica de Orson Welles, velaquí a versión orixinal subtitulada en español.


A obra de Jeff Wayne, un imprescindible.


Jeff Wayne - La guerra de los mundos from Tito Toucho on Vimeo.

Documentos TV: La guerra de los mundos.

A guerra dos mundos en Microsiervos.

A guerra dos mundos na Wikipedia española.

2013/10/30

Agustín Fernández Paz a un chío de distancia

 

O alumnado dun dos clubs de lectura da biblioteca do IES Pobra do Caramiñal vén de escoller como primeira lectura este curso O centro do labirinto.

Esta é a novela dos 50 anos de Agustín Fernández Paz, en Sara tamén dá conta das súas "paranoias" persoais :-)

Agustín co seu pin de Prolingua na lapela.

Hoxe o autor confesou no seu Twitter que na escrita deste libro estivo moi presente a lectura do poema "Límites" de Jorge Luis Borges (Arxentina, 1899-1986).

Hay una línea de Verlaine que no volveré a recordar,
Hay una calle próxima que está vedada a mis pasos,
Hay un espejo que me ha visto por última vez,
Hay una puerta que he cerrado hasta el fin del mundo.
Entre los libros de mi biblioteca (estoy viéndolos)
Hay alguno que ya nunca abriré.
Este verano cumpliré cincuenta años;
La muerte me desgasta, incesante.

Jorge Luis Borges en Antología personal (1961), incluido en Antología de la poesía hispanoamericana contemporánea. 1914-1970 (Alianza Editorial, Madrid, 1971, ed. de José Olivio Jiménez).
Vía asamblea de palabras.

Que marabilla vivir esta época na que podes ter as persoas que admiras a un chío* de distancia.
*chío (tuit en galego)

Éxito de Google Glass


2013/10/18

Contos de soños e sombras



Entre o medo e o terror
PILAR PONTE
 
Contos de soños e sombras de Ariza Piñeiro aparece na meritoria colección Alcaián de UrcoEditora, unha aposta por zume novo na arte da palabra. 
 
Este libro de relatos móvenos entre o medo e o terror con finais por veces sorprendentes ao gusto de Dieste (“A rapaza do meu soño”). O soño convértese nun elemento nuclear ao redor do que xiran obsesivamente varias das historias. O mundo do inconsciente é o punto de conexión entre a realidade e o mundo das tebras, a regaña pola que se coan almas que buscan vinganza ou que nos veñen buscar para nos levar canda elas.
Un dos acertos creativos do autor é o seu aproveitamento da nosa traxectoria fílmica, que lle permite aforrar na parte narrativa porque abonda con suxerir para provocar en nós a imaxe impactante, sabedor de que xa ten gravada nos nosos ollos toda unha cinematografía do terror previa. Contribúe tamén a isto a presenza do Ariza guionista, de tal xeito que o diálogo rápido é quen leva todo o peso da trama precipitándonos cara a uns finais fatais (“Xamais voltarei ao pazo”).
Mais non todas as historias son de medo, e así temos “A lenda do pequeno trasno”, unha fermosa metáfora en clave trasno dos mecanismos de represión utilizados polos centros de poder.
Desexamos que Ariza Piñeiro teña unha vizosa carreira literaria e que non se demore en nos ofrecer o seu próximo froito.
ARIZA PIÑEIRO, César: Contos de soños e sombras. Urco Editora. Colección Alcaián. A Coruña, 2012. 208 páxinas.
_____

Este texto foi publicado en outubro 2013 no suplemento Faro da Cultura de Faro de Vigo.

2013/10/12

Que ben presta que a unha lle boten flores!

Pois si, por que non dicilo, que ben presta que a unha lle boten flores!
E máis se veñen de alguén a quen admiras polo seu traballo como é o caso. Deixo aquí constancia das frases que Ramón Nicolás me dedica no seu blog.
Porque hai palabras que convén gardar.
Grazas, Moncho.


2013/10/10

Manuel Lueiro Rey (1916-1990) A liberdade ferida

A homenaxe colectiva
PILAR PONTE 

Con Manuel Lueiro Rey (1916-1990) A liberdade ferida realízase un acto de xustiza cun autor do exilio interior, ese exilio moito tempo infravalorado no seu labor de sostén da vida cultural galega durante o período da ditadura franquista.

Na obra, aqueles que tiveron un contacto directo co escritor e xornalista van construíndo o seu perfil biográfico. Atopamos aquí o que o coordinador do volume, o escritor e estudoso Ramón Nicolás, deu en chamar a “causa Lueiro”, un círculo dos afectos ao redor do autor de Fornelos de Montes. É por iso que non cabe falar dun ensaio ao uso, xa que se abandona aquí o estudo distante para sentir que “as lembranzas son difíciles”, como recoñece o fillo do autor, e entramos nese roce pel con pel.
Intervención de Ramón Nicolás na presentación do libro no Grove (Fotografía de Todo Grove).
O volume avanza con estudos sobre a obra da que se ofrecen textos inéditos e chegamos a entender como o contacto coa xente da emigración en Arxentina vai influír no paso do castelán ao galego no autor.
Este libro contén ademais unha homenaxe artística colectiva na que participan máis dunha vintena de autores e autoras de diferentes xeracións creativas con producións que van dende a ilustración ata a poesía e a prosa pasando pola caricatura, completando deste xeito un fermoso mosaico de admiración e solidariedade.


NICOLÁS RODRÍGUEZ, Ramón (Coord.): Manuel Lueiro Rey (1916-1990) A liberdade ferida. Edicións Xerais de Galicia. Vigo, 2013. 224 páxinas.
_________

Este texto foi publicado o 10 de outubro de 2013 no suplemento Faro da Cultura de Faro de Vigo.

2013/10/05

"Feminismos" e aprender a estar


PILAR PONTE

Cando vin o filme A onda (2008) de Dennis Gansel que demostra como calquera cidadán democrático é susceptible de ser manipulado para se converter en parte dun sistema ditatorial, pensei que debería ser obrigatorio para todas as persoas o seu visionado para saber estar alerta en democracia. Despois de ler Feminismos, teño unha sensación semellante, a de ter asistido a unha ensinanza fundamental que debería ser compartida e xa non hei esquecer. 


Este volume a catro mans chega a nós grazas á profesora Olga Castro (que nace así de forma exitosa para o ensaio longo despois dunha ampla experiencia en artigos académicos e divulgativos) e á polifacética María Reimóndez (tradutora, ensaísta, novelista, poeta, activista...) que constrúen un ensaio divulgativo rigoroso e ameno que espero teña un longo percorrido lector na nosa sociedade.













A obra estrutúrase en catro grandes bloques de achegamento ao tema. O primeiro deles está dedicado a establecer unhas liñas definitorias mínimas do que podemos considerar feminismos. O segundo bloque dá conta das voces múltiples dos feminismos en Occidente, en Asia ou en África, aquí haberemos de atopar, tamén, un apartado destinado especificamente ao desenvolvemento dos feminismos en Galicia de indispensable lectura, pois estrutura e visibiliza movementos e persoas dende a Idade Media ata os nosos días. O terceiro bloque titulado “Temas planetarios” é especialmente interesante en canto analiza aquelas problemáticas comúns como a violencia de xénero, a maternidade ou a orientación sexual que percorren todo o planeta. O ultimo bloque, “Os feminismos e as disciplinas” ensínanos como os feminismos contribuíron a cambiar as formas de ver e facer nos diferentes ámbitos da cultura, por exemplo no ensino onde están a defender unha escola coeducativa que persegue a pluralidade, a liberdade e a igualdade. Ademais, o libro inclúe un completo índice analítico así como tamén, unha bibliografía recomendada moi actualizada.

Feminismos non só é unha transmisión de datos, é a experiencia de aprender a estar na vida como muller, privativa das mulleres, e porén necesitada tamén dos homes. É a vivencia de se saber pertencente a “esa inmensa revolución pacífica que día a día muda todas as sociedades para facelas máis democráticas”, unha obra que deixa pouso no corazón.

CASTRO, Olga / REIMÓNDEZ, María: Feminismos. Vigo, 2013. 292 páxinas.
_________

Este texto foi publicado en 2013 no suplemento Faro da Cultura de Faro de Vigo.

2013/10/01

Relacións semánticas

A miña primeira infografía. 
 

2013/09/03

2013/08/31

Para que conste


Que todo o mundo o saiba :D

2013/08/19

Día mundial da fotografía


Hoxe celébrase o Día Mundial da Fotografía, para facer os honores gustaríame compartir unha das páxinas que máis momentos de pracer me ofrece ao longo do ano. Trátase do blog Cada día un fotógrafo / Fotógrafos en la red, un proxecto de Luis Martínez Aniesa, un fotógrafo afeccionado guipuscoano que xa leva analizada a biografía e obra de 1668 fotógrafos.
Podes viaxar por esta publicación de forma cronolóxica mais tamén a través dun índice alfabético de autores, por países, comunidades autónomas e categorías onde tamén teñen cabida creadores galegos.
Unha páxina que paga a pena coñecer e seguir.

2013/08/10

aCadaCanto 2013

20130808 aCadaCanto en Noia20130808 aCadaCanto en Noia20130808 aCadaCanto en Noia20130808 aCadaCanto en Noia20130808 aCadaCanto en Noia20130808 aCadaCanto en Noia
20130808 aCadaCanto en Noia20130808 aCadaCanto en Noia20130808 aCadaCanto en Noia20130808 aCadaCanto en Noia

aCadaCanto 2013, un álbum en Flickr.

aCadaCanto en Noia.